Noregscupstemnet i Gaularhallen vart Sunnfjord-ordførar Jenny Følling sitt aller første som publikumar på eit bogeskyttarstemne.
Ordføraren såg ut til å trivast, og fekk god innføring i sporten frå dagens stemneleiar, hovuddommar, sekreteriat, klubbleiar og Førde-trenar, Jan Roar.
– Det er så mykje flott aktivitet i Sunnfjord, smilte Følling og lot seg imponere over innsatsen som vart lagt ned på skytelinja.
Ein del jobb-, studie- og sjukdomsfråfall gjorde at det som var oppunder 30 påmelde, enda i vel 20 skyttarar på første stemne i Region Vest og Region Nord-Vest av sesongens Noregscup.
Slik cupen er sett opp, konkurrerte skyttarane på Sande likevel mot skyttarar i Sandefjord, Hamar, Kristiansand, Sortland og Bodø. Noregscupen er nemlig samansett av tre rundar med lokale arrangement kring om i regionane, før skyttarane blir samla på ein lokasjon til ei stor finalehelg.
Stemnet i Gaularhallen samla skyttarar frå Kvinnherad, Fana, Bergen, Vigra, Ålesund og sjølvsagt Førde.
Av våre deltok Madelen, Harald, Christian og Noemi. Sistnemnde for første gang med på ei uvant ABCD-skyting. Det betyr fire skyttarar på ei matte, der to og to skyt vekselsvis.
Spesielt kjekt å sjå at fleire av skyttarane som deltok i Gaularhallen la seg heilt i toppen av den nasjonale resultatlista.
Vi nemner Hans Einar (Kvinneherad) og Lars Cedolf (Fana) i Tradisjonell 40. Alette (Vigra) i Tradisjonell 60, William (Ålesund) i Barebow 40, Magnus (Vigra) og sist men ikkje minst vår eigen Harald i den store Recurve 40-klassa.
Dei neste rundane av cupen er 31. oktober og 28. november, før finalestemnet på Tinden i Harstad.
Resultat frå første runde av Noregscupen:
For å gjere det endå meir spennande, sette vii dag opp moglegheita for finaleskyting i dei ulike klassane. Sjølvsagt med premiering.
Så må vi rette ei ekstra stor takk til Rema 1000 Øyrane og Extra Førdegården for god støtte til dagens meny.
Neste stemne i regi av Førde bogeskyttarklubb blir kveldsstemne 22. oktober.
Men før den tid, blir det trening måndag klokka 19-22 og torsdag kl. 18-21. Kanskje kjem ordføraren også? Invititasjonen er med dette gjeven.
Magnus I Lagabø Roald (Ålesund) vann Recurve 40-klassa føre Kristoffer Torvik (Bergen) og Hamed Amiri (Bergen).
